Esy sham dy vich

اسے شام دے وچ ہک شام آہی جتھے شام دے مالک رل گئے
اسے شام اچ مڑ آج شام ہو گئ ہو شام نوں ڈیوے گل گئے
اداں ہک یزید نے شام کیتی آج ڈھیر یزیدی تل گئے
کدے گئی اے غیرت مسلم دی کملا غنچے تے پھل گئے

Oohnaa hijar di ag ty

اوہناں ہجر دی آگ تے پرت پرت لایا تلن  دا پورا تران ایں
اساں ریاض جلیبی بن نکلے اوہدی  جبھ دے چسکے  کان ایں
اوہدی اگ دیاں پٹھاں نہیں کیتا ایڈا  حوصلے دا نقصان ایں
اوہدا سیک تے بہہ کے مین  تلنا ایہہ کھا گیا ریاض ارمان ایں

Jy charrnaeen piar di beyrri ty

جے  چڑھنائیں  پیار  دی  بیڑی  تے گھر  بار اولاد بھلا کے ٹر
طوفان  دے  نال  بنا  کے  ٹر  ساحل  دے  نال   ونجا  کے ٹر
ہر  موڑ  تے  پانی  تار  ہوسیں  عزریل  نوں  نال  رلا  کے  ٹر
لانہہ من تے آ  کے ترٹ ویندی گھروں کفن ریاض سوا کے ٹر

To man na man teri mein

توں من نہ من تیری میں دے وچ میری میں دے مرن دا ہتھ اے
تیرا نک رکھیائے  میرے نک دے وچ جیہڑی  ریاض وفا دی نتھ اے
تیرے اندر تاں منصبی کردی ہوسیں تیرے یار اندر دی ستھ اے
تینوں مصر دا تخت دواون  وچ اس کھوہ دا سئے جیا  ہتھ اے

Tera asal tikanrra

تیرا اصل ٹھکانہ  اوہ  کملا  جتھ  کیڑیاں  دی  گزران  اے
جیہڑی  قینچی وانگوں آج چلدی  کل  تالو  نال  زبان  اے
تیرے لوڈے  لاڈے  جسم آتے چھڑی چھڈسن  نہ بنیان اے
تیرے کل  ترکے دی  نیلامی  ترائے  روز  ریاض  مکان  اے

Tasweer us riaz di saarri ay

تصویر اس ریاض دی ساڑی ہے سر رکھ  کئیں دی باہواں تے
ہنے ہتھاں دے جے ہتھ نہ لئیں ٹھڈھ مول نہ پوندی حاں تے
آپوں جان رکھی تصویر اوہدی میں بھکھدے ہوئے شعلاں تے
آکھ  جاں  کھولی شیشہ  تکیا  بیٹھی  ہسدی  ہا  ہوٹھاں  تے

Tenoon lourr ay do gaz raqby di

تینوں لوڑ اے دو گز رقبے دی اوہ وی چھ فٹ بھوئیں دے اندر
جئیں اس کیارے نوں گوڈیا ہے بن گئے ابدال قلندر
ایہدی پچھلی راتیں رونی کر جھٹ آکھ دے ست سمندر
تسکین دی دولت اوہ ملسیں  آ چمسن پیر سکندر

Kehrro dhoorr banenaeen

کیہڑی  دھوڑ بنینائیں  کل ہونائیں ان تولیں دھوڑ حوالے
تیرے وائے توں ڈاڈھے جتھ بیٹھے تیری دھوڑ چھنڈن نوں کاہلے
اتھے  کئی کئی دھوڑ چھنڈا  بیٹھے تیتھوں اچیاں دھوڑاں  آلے
تئیں دھوڑ و دھوڑ ریاض ہونا ہونی  دھوڑ دے دھوڑ حوالے

Me aasu ty rab akbar da ihsaan

میں  عاصی  تے  رب  اکبر  دا    ایہہ  کیڈا   ہے  احسان   اے
جہڑی درد دی دولت بخشی سوں کائنات  توں وکھرا دان اے
ایہے درد ریاض  دی  زندگی  ہن  ایہے  درد میری  پہچان اے
جس  رات  جگر  نہ  درد  کرے  مینوں  کھا ویندا  ارمان  اے

Us say manwaya ay

اس  سئے  منوایاں  میں منیاں  ہاموں  کملا  ادن  اصل  وچ
اگاں ہک  نئیں مننی  سوچ  لیائے  ہن آئی اے  بات عقل  وچ
اوہنوں جدن ریاض دی لوڑ ہوندی دوویں باہیں چا پیندا گل وچ
مینوں سارے شکوے بھل ویندے  منوا  لیندا  ہک  پل  وچ....

Reha jy taeen bakht tikany ty

رہیا جے تائیں بخت  ٹکانے تے سائے  سنگتی  جوڑ  بنا  گئے
سروں ڈھلن  دی ڈھل ہائی ڈنگ پرور لج پرور توں ہتھ چا گئے
آیا جدن   پچھاواں  پیشیں   تے  منہ  رشتہ  دار  وٹا   گئے
پچھ حال ریاض نہ دیگر دا  رہے کھہے  وی جان  چھڑا گئے

Kai pehr musalsal win jhumky

کئی پہرمسلسل ون جھمکے رہنا مثل رکوع دے خم اے
دینا غسل تیری تصویراں  نوں آکھ اودری دے زم زم اے
وت ریاض فریم دا نم شیشہ کرے حاں تے ملم دا کم اے
اسے خاص مسلسل مشق دے وچ نبھ وینا رات دا شم اے

Dharak maar k k niklin

دھرک  مار کے نکلن  ڈیپھیاں دا جداں تروڑ کے در دسکارے
نہیں کئیں دی سندے  ویندے  ہن سدھا رب دے گھر دسکارے

رب سب کجھ کرن تے قادر ہے انج ریاض نہ بھر دسکارے
متاں اوہدی نیند خراب کرن تیرے ایہہ فر فر دسکارے

Rakh bythak tak mahdood sangat

رکھ بیٹھک تائیں محدود سنگت توڑے جتنی دوستی سوڑی
نہ چلھ  دی ساجھ ریاض رلا ایہہ بھائیوالی تھوہ  کوڑی
نہ سیک کسے دے چلھے تے توڑے بھین  ہے نال دی جوڑی
بھاویں گوڈیاں  پرنے رڑنا پئی نہ مانگویں ورت کٹھوڑی

Jis akh vich sharam

جس اکھ وچ شرم ریاض نہیں بچ اس بے شرمی اکھ توں
تیرا لکھ دا بھار نہ ککھ رہسیں ہو ویسیں ہولا ککھ توں
جے ککھ رہ آون لکھ دتیاں  لکھ وار چھڑیون  ککھ توں
جے ککھ لہہ  گئے  تاں یاد رکھیں نہیں واپس آنے لکھ توں

جداں پھل ہا سیت دے بوٹے

جداں پھل آ  سیت دے بوٹے  تے اداں ریاض بے موسما پھل آ
میری  عقلوں  گھتھی  سجناں  دے  ہر  ہک   مسلے دا  حل  آ
اووہ  آج  گل  گل  تے  گل  پوندا  جیدا  کل تائیں گل تے گل آ
پئے  دیگر  ریاض  شریک  سدیندے   ہک  وار  جوانی  ول   آ